Steinkjellerblues

det høljeregnar i kulturbyen
vatnet renn i
strie straumar
fossande ned
Steinkjellersmauet

vått, vått, vått

når sola kjem att
etter lang tids fråver
opnar ei blå dør seg
og ein svart katt
stig ut
myser dovent
ut over reviret
skvettar ein skvett
på ei raudbrun krukke
ser ei dame
i grå gamal frakk
snublar i laus brustein
og bryt hoftebeinet

ein kvitrosa puddel
med skotskruta
regnfrakk
trippar nervøst forbi
stig inn
i ein rosa mercedes
til Grieghallen
medan svart katt
syklar til Garage
og syng sårt på
sin Steinkjellerblues

det høljeregnar
i kulturbyen